عرض مصدر قصيدة "والد الأراجوز" لفؤاد حداد

أنا عندي يا ولاد الحلال حدوته
أنا والدي هو اللي عاشها .
و لا حد قبلي نقشها ـ
فى حجر و لا مخطوط

كان و الدي بالطبع زيي أراجوز
و لكن حزايني
و أنا كنت واد قطقوط
الخالق الناطق دماغي دماغه
الخالق الناطق كما الشَمُّوط
كان صوته ، الله يرحمه ، صُفّاره
و جسمه رايح جي زي الفاره
و عظمُه يا نجارين بيلُق فى الزعبوط

و فى يوم من الايام .. خلّي بالك معايا:
هنا العقده
ندهه الملك و كان ملك أعظم من العمده
و عيّنه مضحك ولي العهده
و قال له :
(( يا ألعب من القرموط
تِضَحّك الولد أَعَلِّى مراتبك
تبكي الولد أقطع راقبتك
افهم كلامي و امشي بالمظبوط ))

والدي ، الله يمسيه بالخير 
ماكانش ناقصه
طَلَّع سلاح أبيضاني وقَطَع رقابته بنفسه
راح الولد فى البكا و أنا والدي مات مبسوط

أنا والدي مات مبسوط .. لإنه عَكَس أمر الملك .. أيام ما كان الملك ملك
و مصروف الأمل مضغوط

و من ساعتها 
وأنا عندي جيوب أنفيه
وعيني كما الحنفيه
و الدمع منِّي وفيه
بحر ماله شطوط