مستخدم:آية/إمبارح روحت زرت المهكر
أول مرة سمعت عن المهكر كان من عوضي. وزي أي ودان عادية وقفته وسألته: "المهجر؟" ابتسملي وقالي لأ المهكر، وبعدين ابتسمت أنا كمان من الاسم.
إمبارح كنت حاسة بتوتر وقلق؛ روحت أضف وبعد اجتماعنا، كنت قاعدة بشتغل في الفسحة، بشكل ما كنت حاسة التوتر مصعب عليا أركز في الشغل. بعدين قمت أمشي شوية وعديت من جنب المهكر وشوفت حسام واقف ناحية الشباك بيلحم حاجة وسامعة صوت مزيكة مكتومة وقاعد وواقف حواليه زمايلنا. عديت.. ورجعت الفسحة تاني. كملت شغل.
بعدين فجأة قمت، ومشيت ناحية المهكر ودخلت. دي مش أول مرة أدخل المكان. دخلته السنة اللي فاتت كذا مرة مع أحمد وفرح قبل ما يتجدد. فلما دخلت حسيت عينية فنجلت من الفرق اللي حصل في المساحة. دخلت ناحية اليمين عند الأدوات المتعلقة. وقعدت أتفرج ولقيت خوذة لحام كبيرة ومواد مش عارفة بتعمل إيه وأدراج كتير غالبًا كمان فيها حاجات. لقيت كرسي بيلف وقعدت ومع إني عمري ما لعبت بالأدوات إلا إني حسيت كل الأدوات المتعلقة والمواد اللي على الترابيزة مخلياني متحمسة وبقى عندي مليون سؤال. لقيت على الترابيزة مجسم إيد أبيض. فكرت إن ممكن دا يكون بقية نشاط أو كانو بيجربوا حاجة. الإيد ماكنتش شبه إيدي، بس بعد ما صورت إيدي جنبها، حسيتها شبهها.
الدنيا في المهكر سريعة؛ في الدقايق اللي كنت قاعدة فيها حسام صلح حاجة وعمل صندوق في دقيقتين وقطع لوح بيضا ورتب حاجات... بس بعد شوية افتركت إني ماخلصتش شغل وروحت جبت اللابتوب ورجعت المهكر أكمل شغل...